Bovio - Valente

' A canzone d''e ccanzone,
saglie a ll'alba da 'e ciardine...
fa arapí cchiù 'e nu balcone,
fa cantá tutt''e mmarine...

Va p''o monte e torna a mare
quanno, lenta, scenne 'a sera...
quanno Napule mme pare
na canzone 'e Primmavera...

Tutto canta...
Tutto chiagne e tutto canta
da 'a matina,
da 'a matina 'nfin'â sera...
Che paese,che paese cantatore!

Ma 'a canzone d''e ccanzone,
ch'hann''a fá?...E'Napulitana!

A canzone d''e ccanzone,
è cchiù doce 'e nu suspiro...
sta 'int''e vvoce d''a stagione,
sta 'int'a ll'aria ca respiro...

E chi canta? E va' andivina...
Canta 'o sole, e ll'accumpagna
tutt''azzurro d''a marina,
tutt''o vverde d''a campagna.

Tutto canta........................

'A canzone d''e ccanzone
sta 'int'a ll'uocchie 'e nénna mia
ca mme guarda e, senza suone,
mette 'a mùseca e 'armunía...

E cu ll'uocchie canta e dice:
"Niente tengo - e niente tène -
tengo sulo, e só' felice,
ninno mio ca mme vò' bene"!

Tutto canta........................