| 'ALBERGO 'E LL'ALLEGRIA |
Carulí', bona furtuna,
T'hê 'ncignato n'ata vesta!
E 'sta toppa a mezaluna,
chi t''ha fatta, Carulí'?
E va buono...s'è capito,
nce starrá n'atu francese...
Ma nun sape ca sti spese
só' perdute 'ncuoll'a te?...
Siente a me, bellezza mia,
chistu core ca tu tiene,
pare 'Albergo 'e ll'Allegria:
uno vène e ll'ato va...
E chist'uocchie, belle e chiare,
ca só' duje repassature,
fanno ll'arte d''e sanzare
passaggiere p'acchiappá!...
Tu nun tiene na bellezza:
sóngo 'e tratte ca tu tiene...
Ca cient'uommene 'int''a rezza,
si' capace d'acchiappá!...
Hê lassato 'o farenaro,
hê 'nchiantato 'o canteniere,
hê traduto 'o salumiere...
'o barbiere manc''o vuó'!...
Siente a me, bellezza mia,
..........................................
Carulí', tu te credive
ca cu 'e cchiacchiere e cu 'e ciance,
dint''o sacco mme mettive,
'nziem'a ll'ate, pure a me?!...
Ogge, 'a femmena è mellone:
nun se piglia senza prova...
comme 'nfatte, quann''a trova,
core e fede ha da mustá...
Siente a me, bellezza mia,
..........................................
