'Ammore mio, guaglione, è ghiuto â scola
tant'anne arreto senza fá maje niente:
Screveva 'ncopp''e banche una parola
e una parola se teneva a mente:
Screveva "Amalia" e, comme niente fosse,
pazziava cu 'e nnennélle a zompafuosse...

E i' nun sapevo scrivere
nun ghiévo p''o ssuttile:
senza sapé' 'a grammatica
screvevo dint'abbrile:
"Mio dorge amore,
ti oh conzervato
un pizzo nel mio quore!"

'Ammore mio guaglione, pazzianno,
pigliaje sùbbeto ll'uso a fá filone:
Quaranta juorne 'e scola tutto ll'anno!...
E si ê vvote leggevo 'a lezione,
truvavo, 'mmiez'ê paggine, â 'ntrasatto,
nu ricciulillo d'oro o nu ritratto...

Io nun 'ngarravo a leggere:
sbatteva 'o core 'mpietto...
Ma, pure senza virgole,
liggevo stu biglietto:
"Mio dorge amore,
pur'io per te,
ci oh un pizzo nel mio quore!"

Mo 'ammore è tutto calamaro e penna...
ma i' mm''a ricordo a chella piccerella:
purtava 'o panarino cu 'a marenna
na cinta a tre culure e na cartella...
E i' ll'aspettavo a 'o sòleto puntone
pe' dí: "Guarda che sole...fa' filone!"

Zero cu ll'asteristico
pigliaje a bene e a male...
E avette 'a peggia media...
pur'essa: tale e quale.
Duje cunte pare:
Zero allo studio...
e vase a centenare!