Uocchie turchine culore d''o cielo,
labbra 'e curallo cu 'addore d''o mare...
Bammenella d''o Mercato...
'a chiammavano accussí!
E faticava, da 'a matina â sera,
dint'a na stanzulella fredda e scura...
Diceva tutt''a gente d''o quartiere:
"Chesta figliola è 'a perla 'e ll'onestá,
e guaje a chi se permette 'e ce 'a tucca!"

...Ttuppi - ttuppi - ttu:
S'appresentaje ll'ammore:
Nu bellu giuvinotto marenaro.
Povera figlia senza 'e genitore:
se facette lusingá...
se facette 'ncatená.

Era na santa, campava 'e fatica,
na vesticciolla sultanto teneva...
s''a lavava e s''a stirava,
quanno jéva a cunzigná...
Mo nun se vede cchiù 'sta vesta spasa...
e 'o balcunciello sujo sta sempe 'nchiuso...
'A gente dice: "Comme va 'sta cosa?
Tenéssemo 'o duvere 'e ce 'nfurmá!..."
E quaccheduno è ghiuto a tuzzuliá...

...Ttuppi - ttuppi - ttu:
- Vuje stisseve malata?
Parlate...Ve servesse quacche ajuto?
Vuje site Bammenella d''o Mercato...
Ce putite cummanná,
vuje ce avit''a cummanná! -

Pe' Sant'Eligio s'è spasa na voce:
"Povera figlia ce ll'hanno perduta!"
Ogne giovane annurato,
nun se pò capacitá.
E 'o cusetore nun fa cchiù vestite...
E 'o masterascio 'nchiova nu tavuto
e dice: "Chillu 'nfame scellarato,
chello ch'ha fatto, ce ll'ha da pavá...
'Mmiez'ô Mercato...chesto nun se fa!..."

...Ttuppi - ttuppi - tu:
E trase nu duttore...
- Duttó' ce sta speranza? - Nun 'o ccrero!
E' pazza e chiamma sempe 'o marenaro... -
Ma va' trova chi sarrá?
Ma va' trova addó' starrá?
.........................................
.........................................
Ma che tempesta nera!
Na voce 'e piscatore:
"Na varca s'è sperduta 'mmiez'ô mare..."
.................................................................
.................................................................
Chi fa male 'ha da pavá
Chi fa male 'ha da pavá!