Se ne sagliesse â parte d'Uttajano
chi vò' campá cujeto, si vò' bene...
Saccio na casarella fore mano
cu duje balcune e, attuorno, 'e tterre chiene
'e resedá e garuófane schiavune...

Jénche 'e ciardine 'e rose, 'a primmavera,
ll'autunno, 'mmiez'ê vvigne, ména ll'oro...
Ce canta 'o core mio, matina e sera,
e, tutto ll'anne, 'o core mio suspira!

E saglie 'o core mio 'ncopp''a muntagna,
addó' ll'ammore 'o vò' fá fá 'a vennegna...
Vase ca só' cchiù meglio d''o sciampagne...
E, quann''a 'ncigne, è tènnera e sanguegna
'sta vocca rossa...ch'è 'a cchiù bella vigna!...

Acene d'uva sóngo 'e vase doce,
e cchiù arzulenta è ll'uva, e cchiù mme piace...
Chella, è 'a passione che mm'abbampa e coce...
Chella, è 'a passione ca mme fa felice...

Saglimmo a duje. Cantammo. E canta ll'eco
pe' 'mmiez'a 'e chiuppe d''a muntagna amica...
e ce desiderammo...'O ppenzo...'O vveco...
Lapillo 'e fuoco è 'ammore, quanno trica...
E trica, e ce fa ardente a poco a poco...

E nuje saglimmo. E stammo 'ncielo quase:
Luntane, veco casarelle e chiese...
Ah, che funiculare sóngo 'e vase:
Nuje ce vasammo...e ghiammo 'mparaviso!