Miezojuorno. Coce 'o sole...
e vuje state 'int''o ciardino,
sott''e ffronne 'e mandarino,
'mmiez'ô gghianco d''e llenzole
spase ô sole...

E na chiorma 'e palummielle,
vola, vola attuorno a vuje
ca lle date 'e mullechelle...
Spuzzuléa, po' se ne fuje
chesta chiorma 'e palummielle....

Accussí, pe' 'sta passione
ca mme struje,
volano sempe, volano
tutt''e penziere mieje...attuorno a vuje!...

Ma pecché, sbattenno 'e mmane,
ma pecché vuje n''e ccacciate
sti palumme aggraziate,
mentre po' lle date 'o ppane,
'mmiez'ê mmane?!...

Se ne vanno 'ncopp''o mare,
p''e mmarine, a duje a duje,
'ncopp''e titte, 'e campanare,
e po' tornano addu vuje...
Se ne vanno 'ncopp''o mare...

Accussí, pe' 'sta passione
ca mme struje,
si n''e ccacciate, tornano
tutt''e penziere mieje...attuorno a vuje!...