A. Gill

E tenevo na bella putechella
ch'avevo fatto tanto p'accurzá...
Soglia 'e marmo, bancone musticella:
ce asceva chellu ppoco pe' campá!

Vene 'o padrone 'e casa
dice: "'A mesata è poca!
mettitece 'a si-loca
e 'un ne parlammo cchiù!"

E aggiu lassato chella putechella,
speranno 'e ne truvá n'ata cchiù bella!

Core, fatte curaggio,
'sta vita è nu passaggio:
Facimmoncillo chistu quatto 'e maggio...
che ce penzammo a fá
si 'o munno accussí va?!

E tenevo na bella casarella
cu stanza 'e lietto e cammera 'e mangiá...
Na cucina, nu muorzo 'e luggetella...
nc'êvo fatto 'o grillaggio pe' ll'está...

Arriva ll'esattore;
dice: "'A mesata è poca!
Mettitece 'a si-loca
e 'un ne parlammo cchiù..."

E aggio lassato chella casarella
speranno 'e ne truvá n'ata cchiù bella!

Core fatte curaggio,
'sta vita è nu passaggio
facimmoce 'o sicondo quatt''e maggio,
che ce penzammo a fá
si 'o munno accussí va!?

E tenevo na bella 'nnammurata
ch'avevo fatto tanto p''a 'mpará...
Ma che saccio ched è, ll'hanno 'nciuciata:
nun è cchiù chella ch'era n'anno fa:

Primma, na rosa semplice,
mm''a faceva felice...
mo vò' 'e brillante e dice
ca manco niente só'...

E i' lasso pur'a essa e bonasera!
e mme ne trovo a n'ata cchiù sincera.

Core, fatte curaggio!
'sta vita è nu passaggio...
Facímmoce chist'atu quatt''e maggio...
Che ce penzammo a fá,
si 'o munno accussí va?