Gambardella - Califano - Di Capua

'E rragazze mo stanno in ribbasso:
vanno a caccia p'avé nu marito...
e, pe' farse passá stu prurito,
lloro 'o ssanno quant'hann''a suffrí!

Nun só' cchiù chilli tiempe 'e na vota
quanno ll'ommo jéva appriesso â gunnella
e pe' ll'uocchie 'e na femmena bella,
mo nce vò', se faceva spará!...

'E rragazze, cu 'o cannelotto,
vanno ascianno 'o giuvinotto...
quanno ll'hann'avuto sotto,
nun s''o fanno scappá cchiù!...

'E rragazze, cu 'o cannelotto,
vanno ascianno 'o giuvinotto...
quanno ll'hann'avuto sotto,
nun s''o fanno scappá cchiù!...

'O prugresso ha purtato cchiù lusso...
'O guverno ha mettuto cchiù tasse...
Chi vulite ca mo se 'nzurasse?!
Quacche pazzo surtanto 'o ppò ffá!

Séh, purtáteve 'a femmena â casa:
'int'a niente ve fa na famiglia!
Quanno è doppo, che bella quatriglia
cu 'a Miseria, vulite abballá!

'E rragazze....
......................

Picceré', 'a capite 'a canzone?
Senz''e llire nisciuno ve sposa!
Abballate...facite 'e sciantose:
'A furtuna, ll'avit''a scetá!...

State lustre cu ll'aco e cu 'o ffilo,
mo arrivate cu 'o fierro e 'a cazetta...
Si 'un facite vulá 'a machinetta,
picceré', v''a putite sciusciá!...

'E rragazze...
.....................