ESTATE!

Peppino De Filippo

Estate:
Into 'o cielo turchino,
na nuvola 'e seta,
p''o cielo cammina...
Cammina...

Estate:
campagne e ciardine,
p''o cielo spannite
prufumo e canzone....
Canzone...

'Ncopp''e llogge e p''e mmure,
giesummine a migliare...
sciure 'e tutt''e culure:
comm'è bello a guardá!

Se sente, luntano,
nu sisco 'e vapore...
nu suono 'e campane,
n'auciello in amore...

Carmè', Carmè', Carmè',
cchiù bella è ll'estate,
cchiù doce mme pare,
campanno cu te...