LA GROTTA AZZURRA

C. Valente

Jammo, nennélla mia...
giá la varchetta è pronta.
'Sto core è n'allegría
te dice: "Viene, vié'..."
e dint''a Grotta Azzurra
haje da vení co' me!

Vide, tra li ccampagne,
Meta, Sorriento e Vico...
de Massa li mmontagne,
sfílano 'nnanze a te...
E dint''a Grotta Azzurra
t'abbracciarraje co' me!

Mo ca te tengo a lato,
'ncopp'a 'sta varca mia
pare ca mo só' nato
lo cielo pe' godé...
Jammo a la Grotta Azzurra...
voglio morí co' te!

Acálate no poco:
stentato è lo passaggio!
Jarría dint'a lo ffuoco
pe' stá vicino a te...
Chest'è la Grotta Azzurra
non haje cchiù che bedé!