LL'AMMORE 'NCAMPAGNA

E. Murolo - V. Valente

P''a strata campagnola va stu core:
canciello apierto...casarèlla chiara...
Nu vascio lindo e pinto 'e lavannara
e Matalèna cu 'e bbraccélle 'a fore...

Ll'arbero 'e fiche 'int''e ccampagne addóra
e vola 'a luce-luce a primma sera...
e na massarianta cantatóra,
zappa na vigna e canta allèra allèra:

"Ca tu n''o cacce, Ammore sempe vénce
e 'mbracci'a ninno, oje mamma,
portamménce...
oje portamménce..."

Io ll'aggio ditto ca só' de buon core,
ca só' assignato e tengo quacche lira.
Essa mm'ha ditto ca pe' me suspira,
ch'è zetelluccia e senza genitore,

e penza a me quanno 'a campagna addóra
e vola 'a luce-luce a primma sera...
e quanno 'a parzunala cantatóra,
zappa na vigna e canta allèra allèra:

"Ca tu n''o cacce, Ammore sempe vence
e 'mbracci'a ninno, oje mamma,
portamménce...
oje portamménce..."

Na casa a monte e n'aria 'e primmavera
pe' Matalena, nata 'mmiez'ê sciure,
na stanza a mamma mia, ch'è vecchia pure
e fila e dorme da 'a matina â sera...

Voglio spusá quanno 'a campagna addóra
e vola 'a luce-luce a primma sera...
e quanno 'a parzunala cantatóra,
zappa na vigna e canta allèra allèra:

"Ca tu n''o cacce, Ammore sempe vénce
e 'mbracci'a ninno, oje mamma,
portamménce...
oje portamménce..."