MADAMA CHICHIERCHIA

Califano - Gambardella

'Ncopp''o vico Sergente Maggiore
ce sta 'e casa Madama Chichierchia...
E' nu tipo ch''ha fatto furore:
'e giurnale, ll'ha fatte parlá!...

'O marito, 'on Filippo Cupierchio,
'o negozio, 'o teneva a Tulèto...
e nun ghiéva né annanze e né arreto:
'a Chichierchia 'o facette fallí!

Madama Chichierchia 'a ccá,
Madama Chichierchia 'a llá ...
diente 'mmocca nun tene cchiù
e vò' ancora 'o zùchetezù...

Madama Chichierchia 'a ccá,
Madama Chichierchia 'a llá...
pile 'ncapa nun tène cchiù
e vò', a forza, 'o zùchetezù!...

'Sta Madama n'ha fatto tulette:
feste, balle, triate, carrozze...
chelli ggamme hanno fatto zumpette,
se n'ha sciso cannuole e babá!

E mo tène nu cuófano d'anne,
e vulesse fá ancora 'a ragazza:
se 'nfarina, s'alliscia e 'mpupazza...
e va a caccia d''e belli garson!

Madama Chichierchia 'a ccá,
..............................................

N'anno fa, steva proprio 'mpalicco
chella 'mpesa 'e madama arruzzuta...
ma murette nu zio straricco...
e Chichierchia turnaje a saglí.

'O marito è ciuncato cu 'e ggamme...
e Madama ha truvato 'e cascante...
Essa 'o ppiglia a muneta cuntante,
ma 'e cuntante...c''e ffanno cacciá!

Madama Chichierchia 'a ccá,
..............................................