Sacco - Gagliardi
N'aucelluzzo 'nfame,
'mpietto mm'ha muzzecato...
stu core s'è arrubbato
e nun mm''o vò' cchiù dá.
Aucelluzzo mio,
nun mme fá stu dispietto:
i', senza core 'mpietto,
comme faccio a campá?
Ll'avevo dato a essa,
ma po' mme ll'ha turnato...
sceppato, scamazzato,
redutto na pietá!
Si 'o vuó', ne faccio a meno...
t''o dóngo, bene o male,
ma tiénelo carnale:
nun mm''o fá maje suffrí!...
Nun fá comm'ha fatt'éssa
quanno nce ll'aggio dato,
ca 'mpietto ll'ha purtato
sulo p''o fá murí!...
Finale:
Si 'o vuó', ne faccio a meno...
t''o dóngo, bene o male,
ma tiénelo carnale:
nun 'o fá maje suffrí!...
Nun fá comm'ha fatt'éssa
quanno nce ll'aggio dato,
ca 'mpietto ll'ha purtato
sulo p''o fá murí!...