Galdieri - Nardella
E cóntatélle oje core, e cóntatélle!
E vide quante só' fin'â trentina:
quatto só' bionde, tre só' brunettelle
e nun ce manca 'a rossa malupina...
E nun ce manca na guagliona 'e scola
comme ce sta na femmena 'gnurante...
- Ma si bene se vò' na vota sola
tu comme n'hê vuluto bene a tante? -
Na vota sola!...
po' è capriccio 'e giuventù:
Ogne mese na figliola,
ma nun se vò' bene cchiù...
Maje cchiù!
E cóntatélle oje core e statte zitto!
Chi aggiu vuluto bene overamente
i' nun ll'aggiu cuntata p''o dderitto...
ca nun 'a voglio manco tené a mente...
E si s'è mmaretata o si è figliola,
nun 'o vvoglio sapé, senza che cante...
ca si bene se vò' na vota sola,
io 'a voglio bene ancora...'mmiez'a tante!
Na vota sola!...
po' è capriccio 'e giuventù:
Ogne mese na figliola,
ma nun se vò' bene cchiù...
Maje cchiù!