Tarantella cu tófe e tammórre
don Peppe d''a Torre
vulette abballá.
E 'a mugliera faceva 'a cunzerva
cu 'o frato d''a serva
p''o fá recriá.

- Margarí', pecché nun scinne? -
- Che si' pazzo? e comme faccio?
Tengo 'e mmane 'int''o setaccio...
Peppe mio, spássate tu! -

- Quanno è chesto allora è niente:
nun dá retta, Margarí'! -

Che mugliera, che femmena 'e casa,
si appena t'annasa,
te sape pittá.
Chella è fina, terribbele, accorta...
Muglièrema, 'a porta
s''a sape guardá!

- Margarí', che staje facenno?
Jammo, di' quacche parola... -
- Stóngo 'nfacci'â pummarola,
Peppe mio, che chiamme a fá? -

- Quanno è chesto allora è niente:
nun dá retta, Margarí'! -

Tarantella: don Peppe abballava,
zumpava e penzava:
- Ma chesto ched è?!...
'Sta cunzerva sarrá nu pruciesso...
mme date 'o permesso
ca vaco a vedé? -

- Nèh don Pè', comme ve vène?
Dint''o mmeglio ce lassate?
'A mugliera mo 'a penzate!
Lassat'í, ch'have che fá!

- Quanno è chesto allora è niente:
nun dá retta, Margarí'! -