Galdieri - Capolongo

Oje capèra, ca passe ogne matina,
famme na gentilezza, ogge o dimane,
quanno spícceche 'a capa a Catarina,
tu fammélla passá chello d''e cane...

E si te spia: "Ma comme va 'sta cosa?"
dille ca tiene 'a fá na capa 'e sposa.
Che vaje 'e pressa, ca...nun saccio che...

Dille ch''a sposa sta aspettanno a me...!

Oje scarparo, cu 'a lente 'ncopp''o naso,
saccio ch'hê 'a cunzigná, p''a fin''o mese
- ciappe 'ndurate e nucchetelle 'e raso -
nu scarpino cu 'o tacco tirulese.

Pecché canosco 'a giovane ch'aspetta,
miettece 'e zzeppe e fance 'a ponta stretta...
E si essa spia: "Pecché sóngo accussí?"

Tu spiegancello ca t''aggiu ditt'i'...

Oje curzettara, ca nu busto 'e seta,
taglie e 'nchime, p''a vita 'e na pupata...
Oje curzettara, si vuó' stá cujeta,
falle 'o curzè'...ma siente 'sta 'mmasciata:

Na ponta d'aco lássace a mancina,
ch'ha da pógnere 'o core 'e Catarina...
E si, quanno se pógne, essa dice: "Ah!..."

Tu spiegancello chi t''ha ffatto fá!