Vento - Albano
('Nnanz'ô cafè)
Nun ve mettite 'ncerimonie, grazie...
ca nun è ora 'e farce cumplimente...
Anze ve prego molto gentilmente,
susiteve...pecché v'aggi''a parlá...
Amice, permettete...
no, nun v'incomodate...
ca nun succede chello ca penzate:
io ll'amicizia 'a saccio rispettá...
Però mme piglio collera
quanno qualcuno, falsa, 'a vò' trattá.
(Dint''o vico)
V''o vvoglio dí pe' vostra norma e regola:
ajeressera îte sbagliato assaje...
Na curtellata si', ma schiaffe maje,
penzátelo nu schiaffo che vò' dí...
'Ngiulina nun è chella
ca vuje ve 'mmagginate...
'e schiaffe date a essa, a chi aspettate
ca nun 'e rripetite pure a me?!
Facite scuorno a ll'uommene...
tutto pe' tutto...ll'arma aggi''a vedé!...
(L'arresto)
E sissignore...brigadié'...purtáteme
'ncopp''a Quistura, ô carcere...'ngalera...
chi dice niente?...ma cu cchiù maniera...
ll'aggio ferito? 'O ssaccio...comme?...Chi?
Nun è ferito?...è muorto!?
Mme state cunzulanno...
ll'uommene 'e niente chesta fine fanno!...
Mo niente cchiù desidero...pecché,
tenevo ccá nu písemo...
e mo mm''aggio levato...Brigadié'!