QUANNO 'AMMORE VO' FILA'

E. Murolo - E. Tagliaferri

Canciello 'e massaria, canciello 'nchiuso
che catenaccio mamma nc'êva miso!
Sti ddoje zetelle, duje cunfiette rosa,
sperévano pe' n'ommo e pe' nu vaso...

E manco 'a bruna, 'a cchiù maleziosa,
puteva ascí da 'a casa cu na scusa...

E allora Ammore...ndránghete!...
na notte che te fa?
Cu na scalella d'oro,
'mbracci'â bruna se ne va!...

"Nenné',- dicette 'a 'gnóra,-
che sóngo sti suspire?"

"E' 'o ventariello, oje má',
ca smove 'e ffronne,
'a notte, 'int'a ll'está..."

E 'a bruna addeventaje cchiù ghianca e rossa
senza russetto 'nfaccia e 'mpont'ô musso...
Cu 'o core doce comm'a ll'ananasso
se prufumava 'e ccarne 'e spicaddossa...

E 'a sora picciava appriesso a essa:
"Pecché sulo pe' me, nisciuno passa?"

E allora Ammore...ndránghete!...
na notte che te fa?
Da n'albero 'e cerase.
'mbracci'â bionda se ne va!...

"Nenné', ma chi se lagna,
pe' 'mmiez'a 'sta campagna?"

"E' 'a volpe, duorme oje má',
che 'a pullanchella
è ghiuta a muzzecá..."

Chiagnenno tutt'e doje 'mbracci'â cummara
tenevano 'e ffaccelle comm''a cera...
Dicette 'a cummarella: "Oje né' ve prore!?
Jammo addu mamma aunite a sti signure...

Cummá', né catenacce o mascature,
nce ponno pe' na femmena in amore...

Si vò' filá, nu spruóccolo
ll'abbasta pe' filá...
si 'a 'nchiude 'int''a furtezza,
mette 'e scelle e se ne va...

Si 'nnanze vede 'o ffuoco,
si 'nnanze tene 'o mare...

...nu segno ca lle fa,
cu ll'uocchie 'nchiuse,
'mbracci'a 'ammore va...

Trasíte, picceré, sposa cu sposo,
vasáte 'a mano â 'gnóra...e tanta scuse..."