Nuttata 'e Piererotta! Tutte dormono
'ncopp'a 'sta cimma 'e monte cunquistato,
e io faccio 'a sentinella e stó' scetato...
Nu passo, nu rummore...Chi va lá?!

E vuje paisane mieje ca state a Napule,
chesta nuttata, vuje, comm''a passate?
Nce jate a Piererotta o nun ce jate?
Ce sta chi, na canzone, cantarrá?

Vurría ca nu signale
facísseve 'a Pusilleco
pe' me puté 'nfurmá...
E n'auto, tale e quale,
pe' dirve: "Ve ringrazio..."
io ne facesse 'a ccá!

Nuttata 'e Piererotta! Che silenzio!
Pure 'e cannune mo se só' addurmute...
Na voce arriva a sti mmuntagne mute:
vène da 'o mare mio pe' mme chiammá...

E a vuje, Napulitá', che state a Napule,
ve chiamma o no, stanotte, chistu mare?
Ne tene sempe varche 'e marenare?...
Na varchijata v''a putite fá?

Mánnateme 'a risposta
cu nu signale, sùbbeto
facitela vulá...
Si mme screvite, 'a posta
ritarda...e pò succedere
ca nun mme truvarrá...

E tu Carmè', Carmè', ca siente sbattere
'o core, 'mpiett'a me, pure 'a luntano,
comm'io mm''o stó' sentenno sott''a mano...
che faje stanotte? Chiagne? Ma pecché?

Si tanto doce ancora è 'o cielo 'e Napule,
si ancora tene 'e stelle che teneva,
si dice ancora 'e ccose che diceva,
guardanno 'ncielo, parlarraje cu me!

Ccá 'o cielo è tutto stelle
che chiágnono...Ma 'e llagreme
nun vònno fá vedé.
Io guardo 'e ddoje cchiù belle:
Una assumiglia a mámmema...
Ll'áuta assumiglia a te!...