Marená', si nun tiene cchiù 'a varca,
che nce aspiette, che spiere da 'o mare?
Ire 'o rre d''a marina...e mo pare
ca nun tène cchiù regno stu rre...

Tu nun parle, nun chiagne, ma guarde
comme sfilano 'e vvele lucente...
ma tu sulo nun tiene cchiù niente,
tu nun tiene a nisciuno pe' te!

Tu chi si'? Si' straniero a stu mare...
Tu che vuó'? Si' straniero a chest'onne...
Daje na voce? E nisciuno risponne
ca nisciuno mo sape chi si'...

Passa Ammore, 'int''a varca, cantanno...
e 'a canzone che canta è a doje voce...
Ma che gusto a te mettere 'ncroce?
Ma che sfizio a vederte 'e suffrí?!

Scenne 'a notte...E' spuntata na stella...
Quacche voce luntana luntana...
Na varchetta...nu suono 'e campana,
lento e stanco, 'int''a notte d'está...

Marená', ma pecché guarde 'o mare?
Tiene 'a faccia cchiù ghianca d''a cera...
Che vuó' fá? Torna â casa stasera...
Mamma è vecchia e t'aspetta...Ch'hê 'a fá?

Tu nun tiene a nisciuno pe' te!