Bella è 'a campagna, ma è cchiù bello 'o mare...
stu mare malinconico d''a sera...
A mezanotte, Napule mme pare,
dint'a ll'oscuritá, na fata nera.

Passa na varca, sona na campana,
chiagne na voce 'ncopp''o mandulino...
E io canto: Bella mia ca staje luntana
te voglio bene e nun t''o vvoglio dí!...

'Ammore canta, na chitarra sona,
e 'o mare addora, e addorano 'e ciardine...
e io 'nzerro ll'uocchie tanto ca mme stona
st'addore d'erba 'e mare e mandarine...

Passa na varca, sona na campana,
chiagne na voce 'ncopp''o mandulino...
E io canto: bella mia ca staje luntana,
te voglio bene e nun t''o vvoglio dí!...

E voca voca! 'A varca s'avvicina...
Tremma na mana 'a rèto a nu balcone...
'A pace è fatta!...I' 'a veco...E' Carulina!
E tutt''o munno pare na canzone!

E sona allèra allèra, na campana...
e siente comm'è doce 'o mandulino...
no, nénna bella mia...nun sta luntana:
e io 'a voglio bene e mo nce 'o vvoglio dí!