Se só' duicientotrenta manduline,
ciento chitarre e uttanta contrabbasse...
E sóngo tutte prufessure fine...
cu 'a cravattella janca e 'o fracchesciasso,
sonano piezze d'opera,
fòcchese-trotte, e museca
d'ogne paese e d'ogne qualitá...
I' nun saccio suná,
ma saccio cummanná
comm''e maeste d''o Cafè sciantá!
E tengo, pe' bacchetta, 'o scurriato...
pecché Mascagni, quann'è direttore,
mme pare nu cucchiere ammartenato...
E i' pe' fá cchiù rummore,
mme metto a scassiá...
Arri! Arri! A'...
Musicaaaa!

E nun bastava sulo nu tenore:
n'aggio pigliate quase na ventina!
Trenta soprane ca se fanno onore:
tutte cu 'a voce avvellutata e fina!...
E quinnece baritone
ca, quanno 'a vócca arápeno,
'O "quattucientovinto" nun ce pò!
I' nun saccio cantá
ma saccio cummanná..
Dico: "Pigliáte 'o MMI, mettite 'o LLA"
E allazzo ogne tantillo na jastemma
pecché Mugnone ha ditto: "'O direttore,
si nun ghiastemma e tene troppa flemma,
nun se fa troppo onore,
né se fa rispettá..."
Ah, mannaggia chi...
Musicaaaa!

No, chesta nun è comm'a tutte ll'ate!
chesta s'ha da chiammá serenatona.
Che faje? Serenatelle e serenate?
Na vota ca ll'hê 'a fá, meglio una e bona!
Se jenche tutt''o vicolo,
se sceta tutta Napule...
e 'o dorge amore 'e capa se ne va...
Tutta Napule, embè,
stasera ha da sapé
ca i' voglio bene a chi vo bene a me!
Pe' dí ch'essa è 'a cchiù bella 'e tutte ll'ate,
ll'aggio 'mparato a coro 'a guagliunera
ca va facenno 'a clacche p''e triate...
Stu coro 'a fa stá allera,
stu coro 'a fa scetá...
Jammo, jammo, ja'...
Musicaaaaa!...