E. Murolo - E. A. Mario

Figliole 'e Capemonte,
cu zuóccole e tammórre...
aunímmoce e abballammo,
ca è festa e 'o tiempo corre...

Ogne ommo cu tre vizie nasce e more:
'O juoco, ll'amicizia e 'o primmo ammore...
Ma, p''e maltrattamente ca mme fa,
d''o primmo ammore mio mm'aggi''a scurdá...

E anduvinate quanno?
E anduvinate quanno?

Quanno ll'aucielle canosceno 'o ggrano...
quanno na rosa nasce senza spine...
e a Piererotta nun ce só' canzone...

Ll'ammore, 'a ccá nu vaso
e 'a llá na rasulata...
Ma po' nu spusalizio...
e doppo na figliata.

Tre vizie tene 'a 'nnammurata mia:
'E cchiacchiere, 'a tuletta e 'a gelusia...
E pe' 'sta gelusia, nun c'è che fá,
lle voglio bene ma ll'aggi''a lassá...

E anduvinate quanno?
E anduvinate quanno?

Quanno Natale capita d'austo...
quanno 'o Vesuvio 'a Napule se sposta...
e 'a Grotta Azzurra nun è cchiù celeste...

Vintiquatt'ore: 'E core
giá sbáttono abballanno...
Chisá nennélla mia
che spavo sta tiranno...

E cu che sfizio se pò fá ll'ammore,
quanno ce só' cuntrarie 'e genitore...
Io, quanno mamma dice: "Ll'hê 'a lassá..."
rispongo tomo tomo: "'A lasso, oje má'..."

Ma anduvinate quanno?
Ma anduvinate quanno?

Quanno 'o percuoco nasce senza pizzo...
quanno Maria Sufia torna a palazzo...
e 'o Papa esce, pe' Roma, 'int''a carrozza!