Bovio - Albano

Tu si' venuto 'a ll'estero? E io te dico
ch'hê fatto proprio buono a ce vení...
Damme ll'onore 'e cammená cu mico
si te vuò' divertí.

Tu vuò' vedé 'e scugnizze? 'E malandrine?
'E viche scure addò se chiagne e more?
O vuò' sentí surtanto 'e manduline?
E viene appriesso a me, famme 'o favore.

E guarda,
chist'è Napule!
Vòtate buono attuorno...
Ccá se fatica sempe, notte e ghiuorno.
E se fatica e canta, sott'a stu cielo bello...

Amico, viene 'a ll'estero?
E lèvate 'o cappiello!

Ched è nun parle? Nun te fa piacere
'sta musica ca siente attuorno a te?
Só' tutte quante fábbriche e cantiere...
'e vvuò' vení a vedé?

Só' strade nove, só' palazze nuove...
e ògne preta è nu segno 'e passione...
Dincello a chilli llá, quanno te truove,
che sape fá 'o paese d''e ccanzone!

E guarda,
chist'è Napule!
Ccá se fatica sempe, notte e ghiuorno.
E se fatica e canta, sott'a stu cielo bello...

Vide sti tre ca pássano abbracciate?
Chist'erano scugnizze, tutt'e tre....
Guardale buono 'nfaccia. Só' cecate...
E vuó' sapé pecché?

Só' state â guerra, se só' fatte onore,
nce hanno lassate ll'uocchie e só' cuntente...
Mo portano 'a medaglia 'ncopp''o core
e, dint''o core, na passione ardente!

E guarda,
chisto è Napule!
Popolo cantatore
ca 'o juorno ca va 'nguerra, canta e more...
E 'mpunto 'e morte canta. Canta ca 'o cielo è bello.

Amico, viene 'a ll'estero?
E lèvate 'o cappiello!