Di Giacomo  - Valente

'Sta cantina è bella e bona
ma è cchiù meglio la patrona:
La patrona tene na...
E tirití-tiritómmolá!

Tene n'aria 'e na riggina,
na manélla janca e fina
li periétte pe' sciacquá...
E tirití-tiritómmolá!

Tiritáppete e pane grattato,
cantenè', só' caduto malato...
ce vulesse, pe' farme saná...
e tirití-tiritómmolá!

Ce vulesse, 'e 'sta vucchella,
na parola aggraziatella...
Na parola mo che fa?
E tirití-tiritómmolá!

E che fa si doppo a chesto,
chianu chiano, vène 'o riesto?
vène 'o riesto...e che sarrá?
E tirití-tiritómmolá!

Tiritáppete e pane grattato...
cantenè', só caduto malato!
Vuje tenite pe' farme saná...
E tirití-tiritómmolá!

Vuje tenite, 'int''a cantina,
quacche bona 'mmedecina...
Nèh, 'a putesseme assaggiá?
E tirití-tiritómmolá!

Ll'ha assaggiata 'o sposo vuosto
ca mo sta gagliardo e tuosto
e fa 'mmidia e no pietá...
E tirití-tiritómmolá!

Tiritáppete e pane grattato,
isso stesso mme ll'ha cunzigliato!
- Premmettete? - Patrone, cumpá!...-
E tirití-tiritómmolá!

E pur'io, ch'ero cchiù sicco
d''o llignammo 'e nu palicco,
mo...mme pòzzo cuntentá...
E tirití-tiritómmolá!

Stu remmedio overo è santo
e i' mme sento n'atu ttanto...
Chesta è 'a vera caritá!
E tirití-tiritómmolá!

Tiritáppete e pane grattato,
cantenè', mme só' quase sanato...
N'atu mese 'sta cura aggi''a fá...
E tirití-tiritómmolá!