Anonimo

Trapanarella cu 'o trapanaturo
e trápana 'a mamma e 'a figlia pure...
e, trapanianno, 'mmiez'a sti guaje,
canto 'a canzona d''a cuccuvaja...

Na signurina cammina p''a strata,
nu giuvinotto lle fa na guardata...
e chella che sùbbeto è femmena onesta,
aret''o purtone, s'aíza 'a vesta!

San Genná', pènzace tu,
ca tanto d''e ccorne 'un se campa cchiù!

Nu prèvete, 'ncopp'a ll'altare maggiore,
mme pare nu santo prerecatore,
ma quanno va dint''a sacrestia,
vò' mille lire p''Avummaria...

San Genná', tu vide a chiste?
'mbrogliano pure a Giesù Cristo!

E nuce, nucelle e castagne 'nfurnate...
quanta paíse aggiu curriate...
'A Torre d''o Grieco e 'Annunziata
e quanta guaje ch'aggio truvato...
e quanta defiette ch'aggiu 'ncantate!...

'E culamappate só 'e Veneziane,
'e magnapulenta sóngo 'e Milano,
'e meglie cantante stanno a Giugliano,
e 'e tirapistole stanno a Casale...

'E ffacce toste sóngo italiane,
'e cchiù mafiuse só' siciliane,
'e po' 'e sbruffune óongo 'e Rumane,
'e ffemmene belle só' napulitane,
e 'e mmazze 'e scopa só' americane....

'E 'mbrogliamestiere só' ll'ingegnere,
'e 'mbrogliamalate só' ll'avvucate,
'e priévete fanno 'e zucalanterne
e 'e cchiù mariuole stann'ô guverno!

San Genná', dice ca sí...
chi 'o ssape comme va a ferní!

Na signurina, a via dei Mille,
s'ha misa 'a parrucca 'a copp'ê capille...
Quanno va â casa se magna 'e ppurpette
e chi tene famma guarda 'e rimpetto...

Nu giuvinotto, cu 'e sòrde d''o pato,
s'accatta 'o cazone 'mpusumato...
po' va dint''a machina, allero allero,
e vò' mená sotto a chi va a père...

'E ccunuscite a sti milorde,
chille stanno 'nguajate 'e sorde...
'e pate só' tanta scurnacchiate...
e campano 'ncopp''a famme 'e ll'ate....

San Genná', pènzace tu,
ca tanto d''e 'mbruoglie 'un se campa cchiù!

Mme ne vaco pe' sott''o muro,
e sento 'addore d''e maccarune...

Mme ne vaco pe' Qualiano,
e sento 'addore d''e ppatane...

Mme ne vaco p''o Granatiéllo,
e sento 'addore d''e friariélle...

Ma si vaco add''o putecaro,
tutte cosa va cchiù caro...

Ma vedite quando maje
'sta miseria va aumentanno...

e aumenta ogge,
aumenta dimane,
e doppodimane...
sabato sí
e dummeneca no...

Chi fatica se more 'e famma
na vota ca sí
e na vota ca no...

Chi fatica se more 'e fammma
na vota ca sí
e na vota ca no..