Bixio - Nisa

Tre rundinelle napulitane,
lássano 'o cielo azzurro 'e 'sta cittá...
Díceno: - E' vierno, jammo luntano,
ma 'a primmavera nosta è sempe ccá!... -

- Addó' vaje, cumpagna mia? -
- Addó' vaco?...'O vvuó' sapé?...

Io vaco a purtá 'o suono 'e na chitarra
a chi, partenno, se vasaje 'sta terra...
a chi fatica abbascio a na miniera...
e sonna sempe Napule, ogne sera... -

- Vola e va'...
vola e va'...
Pòrtale tutt''e suone...
cántale tutt''e suone 'e 'sta cittá... -

Dice 'a siconda: - Mme tremma 'o core,
pe' miglie e miglie, sola, aggi''a vulá...
Ma pe' 'sta vota, senza dulore,
io voglio lassá 'o mare 'e 'sta cittá... -

- Chi t'aspetta cumpagna mia? -
- Chi mm'aspetta? 'O vvuó' sapé?...

Io vaco a purtá 'e vierze 'e na canzone
a nu surdato ca vò' tantu bene...
vò' tantu bene e more 'e nustalgía
penzanno sempe a Napule e a Maria. -

- Vola e va'...
vola e va'...
Pòrtale tutt''e vierze...
pòrtale tutt''e vierze 'e 'sta cittá... -

Cu 'e scelle aperte, cu ll'uocchie 'e chianto,
'a terza rundinella se ne va...
Suspira Napule comm'a n'amante
dicenno: - Rundiné', nun mme lassá! -

- Turnarraje, cumpagna mia? -
- Turnarraggio?...Chi 'o ppò sapé?...

Io vaco a purtá 'o sole 'e Marechiare
addó' ce sta nu cielo scuro scuro...
Io vaco addó' nun cresce maje nu sciore...
io vaco a purtá 'o sole addó' se more... -

- Vola e va'...
vola e va'...
Pòrtale tutt''o sole...
pòrtale tutt''o sole 'e 'sta cittá... -

Tre rundinelle napulitane...
Tre rundinelle...nun só' turnate cchiù!