Mendia - Nardella

Sotto Natale se pigliaje 'a zampogna,
se ne scennette 'a copp'a la muntagna,
lassanno a Filumena a fá li llegna:

"Faccio denare e mme ne torno â casa
e doppo ce spusammo dint''o mese...
'e sòrde mm'astip'i'...tu astípa 'e vase..."

Ullèro, ullèro...
sunava 'mmiez'â via 'o zampugnariello:
Lle purtarrá furtuna 'o Bammeniello...
e sona...
e penza: - Che peccato ch''a nuvena,
nun 'a sente Filumena...
nun 'a sente Filumena... -

Ll'at'anno aveva fatto sempe 'a folla:
guagliune, viecchie, gruosse e piccerille...
sentévano 'a zampogna e 'a ciaramella...

Stavota li presebbie nun ce stanno:
nisciuno 'o sente, s'è cagnato 'o munno...
'e gruosse e 'e piccerille, mo, che fanno?

Ullèro, ullèro...
sunava 'mmiez'â via 'o zampugnariéllo:
"Oje bona gente, è nato 'o Bammeniéllo..."
e sona...
Ma si nisciuno 'a sente 'sta nuvena,
che lle porta a Filumena?...
che lle porta a Filumena?...

Cuccáto, 'a notte, dint'a la lucanna,
cu ll'uocchie 'nfuse 'e lacreme, se sonna
ca ll'abbasta nu core e na capanna...

Ma lle cumpare 'o Bammeniéllo 'nzuónno
ca lle fa 'o pizzo a riso zennianno...
si duje se vònno, ciente nun ce pònno!...

- Ullèro, ullèro...
- lle dice 'o Bammeniéllo, - sta' felice,
ca chesta mana mia te benedice -
e sona...
Nisciuno cchiù ce crede a 'sta nuvena,
ma ce crede Filumena...
ma ce crede Filumena...